Le wallon - Lès-èfants, s'vos plaît!
Audjoûrdu, c'èst sèmedi d'Pauques èt lès parints dau Djan duvenut 'nnaler aus comissions. Quéne chance! Djan è-st-èvoyî adlé Djène.

Djène, lèye, èle toûrnicote dins lès pîds di s'mame qu'è-st-à fé lès-aprèts po l'din.ner di d'mwin.
- Po l'amoûr di Dieû, Djène, aloz-è djouwer ôte paut! V's-èstoz todi dins mès pîds! Dj'a dè l'bèsogne, mi! Aloz à l'uch, gn-a do solia!
-Et si dj'îreus d'mander à popa po djouwer avou mi?
- Non, lèyoz vosse pa s'ripwaser. Il a faît l'gnût. Il èst nauji.
- O, 'l èst d'djà bon! C'èst todi l'min.me vêci! Gn-a pèrson.ne qui m'wèt voltî. Dj'èva, mins po d'bon. Et dji m'catcherè, èt vos n'mi r'trouveroz nin, èt...
- c'èst ça, c'èst ça aloz vos catchî, mins foû di m'cûjène !
" Vo-l' -là d'djà à l'laîde âdje, waî, li crapôde. Dji n' l'aurè nin vèyu crèche. Lès-éfants, s'vos plaît !".

- Djène! Djène!
- A ! Djan ! Qui fioz là?
- Mès parints sont-st-o botique. Dji pou bin djouwer avou vos?
- Oyi, mins nin o l'cûjène. Mi mame èst co d'mwaîje umeûr. On s'va pormwinrner?
- D'ac' . Alan.n' o Bwès d'Bû.
- Li Bwès d'Bû ? Ewou ç'qui c'èst?

- C'è-st-à l'ôte costé do viladje. E plin mitan, gn-a on vî tchèstia qui c'èst l'propriètè d'on baron. On-ome bin mètu. I travaye dins one banque, à ç'qu'on dit. Gn-a qu'dès monsieûs avou dès grossès-autos qui moussenut vêla. Quand lès cias do viladje apudront qu'nos-î avans stî,ça l'zeû f'rè mau leû vinte. A dadaye! On-z-î va!

- Pinsoz qu'on wazereut bin rintrer, Djan?
- Bin sûr, ê,ça! On n'pout mau, li baron è-st-èvôye.
- Oyi, mins, waîtoz l'pancârte: " Propriété privée. Défense d'entrer sous peine d'amende. Tir à balles. pièges. Poison".
- Pff... Lès bauchèles, ça a todi peû d'tot!
- Non.na, ci n'èst nin ça. Mins, on n'pout nin...
- Vinoz, vos di-dj'! Por on côp qu'on-z-a l'ocâsion d'djouwer aus tchèsturlins dins on vraî tchèstia! Dji sèrè Godefrwèd d'Bouyon, Robin Dèbwès... ou, non, Lancelot Dolac...
Djène s'a lèyî adîre. Mins, qui c'èst bia pa-drî l'grile! Et prôpe! On n'pinsereut jamaîs ça d'en-d-foû! Dès bèlès fleûrs, vos! Dès tchabaréyes, dès clédiès, dès chites d'agaces èt co bran.mint d's-ôtes qu'èle ni coneut nin; " t't-aleûre, dj'è f'rè on bouquèt moman."

- Djène ! Waîtoz vêla, li bèle pitite cayute! On s'î pôreut catchî po fé awè peû vosse man !
Alan.n'-z-î!

- Mins, mins... l'uch, ... c'èst do chôcolat ! Lès meurs, ... c'èst do pwin d'amandes!
E v'loz on bokèt?
- Mins Djan, on n'pout...
- Qui fioz là, vos-ôtes?
- Eu, eu, rin, mossieû l'Baron. Rin. On s'a pièrdu èt...
- V's-avoz fwin
- ...
- Ca vos plaîreut bin d'mindjî do chôcolat?
- ...
- Rèspondoz, insi!
- Bin, ... oyi.
- Li cûjenêre a djustumint faît on wastia au chôcolat avou dè l'crin.me frêche. Et, dj'a tot dès cayèts po l's-èfants, o tchèstia.
Vinoz avou mi.

- Wèyoz, Djène, dji v'l'aveus bin dit qui l'baron, c'è-st-on-ome qui wèt voltî l's-èfants. Djinti,vos-ôtes! Ci n'èst nin comme vosse...
Cric, crac!
- Mins, poqwè r'ssèroz l'uch à dobe toû, pa-drî nos,
- ...
- Poqwè ç'qui vos r'ssatchoz l'clé?
- Poqwè ç'qui... ? Nos v'lans èraler, nos-ôtes! Drouvioz l'uch!
- Trop taurd! V's-èstoz mès prîj'nîs! Et, nin lès pwin-nes di bwèrler. Gn-a todi pèrson.ne qui vos saureut étinde di-d-vêci. Vos rècheroz quand vos parints auront payî cinq cint mille francs!

Bom . Bom. Bom.
Lès-uch di fiêr do coridôr dè l'cauve ont r'dougnî come li ton' wâre au mwès d'djulèt'. Lès-éfants èstin.n' rèssèrés dins l'nwâreû.
- Moman!... Popa!...

Combin d'timps ont-i d'mèré là à tchoûler dins l'frèdeû dè l'cauve?

Dès-eûres, dès djoûs, quétefîye?

Tot d'on côp, l'uch s'a douviè èt l'baron a èmwinrné Djène.
I n''manqueut pus qu'ça! Vo-lès-là chake di leû costé, waî, asteûre! Qwè ç' qu'i vont div'nu? Qwè c' qui l' baron va fé avou zèls, Poqwè ç'qui leûs parints n'lès vègnenut nin r'qwê? Djène aureut co bin raîson. A n'nin crwêre ! Leûs parints qi s'foutenut d'zèls!

Djan s'a pèté à braîre, mins à braîre ! !

Et pwis, il a r'sondjî à li p'tite Djène. Si p'tite mayon Djène! C'èst li, l'ome! C'è-st-à li d' fé one saqwè po l'chaper. Sinon, qwè ç'qu'èle va pinser d'li? Li fé rèche foû dès grâwes di ç'man.nèt mouchèt-là. Gn-a pus qu'ça qui compte. Mac Gyver, qu'aureut-i faît, li?

Po c'mincî, bin agougnî tot. Riwaîtî. Choûter.
Ca, c'èst l'brût d'one clé dins one sère. Pwis, one ôte.Adon, one trwèsyin.me. Ca vout dîre qu'i gn-a trwès-uch divant d'ariver j'qu'à ci.

- A l'têre, c'èst do dagn. Volà on scopia. V's-aloz fé on grand trau èt, quand i sèsrè faît, dji v'lêre'nnaler.

E li-min.me, li baron sondjeut : " Djè l'f'rè potchî d'dins èt, djè l'ètèrrè vikant !"

Djan s'a mètu à l'ovradje maugrè lès lârmes qui ridin.n' au-d-dilong d'sès massales. Sûr, qui l'trau c'èsteut po Djène! Mins l'baron aveut promètu qu'après ça, i pôreut 'nnaler! Qwè fé d'ôte?


Quand l'trau a stî fond assez, li baron a dit:
- Asteûre, vos-aloz potchî d'dins. Et vos c'minceroz à fougnî po fé on tunèl. Vos v'ritrouveroz dins l'cayute di chôcolat. A paurti di-d-vêla, dji n'a nin dandji d'vos-èspliquer l'vôye, don?

Djan n's'a nin lèyî abûser. I saveut bin, asteûre, qui l'trau, c'èsteut por li. Mins, il aleut ièsse pus malin qui l'baron. I l'aleut tchôkî dins l'trau. Adonpwîs, l'acsègnî avou si scopia.
- Comint ç'qu'on faît on tunèl? dimande-t-i, nosse Djan.
- On r'ssatche li têre avou si scopia, don, Inocint quatôze!
- Oyi, mins comint?
- Bièsse, qui v'èstoz, di-st-i l'baron. Rèchoz foû d'vosse trau, dji m'vos va mostrer.

Quand il a stî rèchu, Djan a apicî li scopia avou sès deûs mwins.
I l'a lèvé l'pus wôt qu'i saveut.

Et adon, èt adon, i s'a mètu à tron.ner, à tron.ner!

Oyi, nosse Djan, nosse Lancelot Dolac Dèbwès d'Bouyon qu'èsteut près ' à-z-acsègnî l'baron avou si scopia, nosse Djan tron.neut!

I s'aveut télemint cotapé qu'il aveut r'ssarchî totes lès couvêrtes foû di s'lét!
I tron.neut d'freud!

Chantal Denis R.N.